Cari

Lintang Sumunar

Ojo Turu Sore kaki….ono dewo nglanglang jagad….

Ngenteni Lintang

Langit kulon semburat abang…
srengengene wis wayahe angslup..
wis ra ono mendung ra ono angin…
langit katon padang sumilak ……rembulan alon-alon katon

wus wayahe….
sing dianti-anti bakal katon
yo bakal katon….ngatonke wujude…
ngatonke kerlipe….

Lintang…. mugi saget dados pengarem-arem
mugi saget dados bebingah…
mugi saget dados kusumaning ati….

Kamuflase

sing katon durung mesti katon…
sing ala durung mesti ala…
sing kroso durung mesti roso
sing pahit durung mesti pahit…
sing krungu durung mesti rerungon…
sing unine pujian durung mesti pepuji…

soca mung iso nyawang sing katon…
ala yo katon ala yen soca sing nyawang
ilat mung iso ngrasakno roso…
pahit yo kroso pahit yen ilat sing ngrasakno…
talingan mung iso ngrungokno….
pepuji yo krungune pujian yen talingan sing ngrungokno…

sawangen rasakno ….rungokno nganggo mata batinmu…..
takono nang nuranimu…. opo pancen ala, opo pancen pahit….opo pancen pepuji…

yen durung yakin, sujud…. memuji marang sing kuoso…nyuwun pituduh…. yen ala katono ala…yen pahit yo kroso pahit…yen pepuji yo krungune pepuji…

ojo mergo katon ala, sambat ala…
ojo mergo kroso pahit, sambat pahit…
ojo mergo krungu pepuji, atimu mongkog….
ojo mergo sing katon, ojo mergo sing kroso, ojo mergo sing krungu, lakumu ninggal tata…

Badai Pasti Berlalu

mosak-masik….koncrat-kancrit…
abang mbranang….
saknaliko sepi nyenyet….
mung ono sunare lintang gemebyar….
mung ono luh ….mung ono ambegan landung..
mung ono lego….

Pesene Ebes

Sing landung ambeganmu….
raupi raimu….
telesi mbun mbunanmu…
wisuhi tanganmu..
wijiki sikilmu….
njur sujud memuji marang sing kuasa….

madulo..nangiso sak bantere….
masiyo durung mesti reridhu bakal ilang soko uripmu
tapi mesti gorehmu bakal lerem
atimu bakal tentrem….

 

Jare

Tibake wis patang puluh…
lha kok koyo limolas….

Tibake ora cupet…
lha kok diklelerno…

Tibake adem ayem…
lha kok jare nelongso..

Tibake sandiworo…
lha kok akeh sing percoyo…

Tibake….
lha kok…..

eh embuh….wis kono lah….
mugo2 sesuk wis ganti ukorone…

jare putih…
tibake putih tenan…..

amin…..

Wilujeng Indonesia Merdeka

wis ojo takon artine “merdeka” iku opo
nyatane yo iso mangan …
nyatane yo iso sekolah…
nyatane yo iso ngopi sak uwen2…
nek ono sing durung iso “ngrasakno”
matur ae nang Gusti Allah….
Mugi Indonesia saget tentrem, saget murah sandang pangan

wilujeng Indonesia merdeka……

Khilaf

Wis lerem anggonmu daksiyo…
Wis lerem anggonmu durhaka…
Wis lerem geni nang atimu….
Saiki sepi nyenyet…anyem….anane mung getun…
Mugi getunmu getun tenan…ora koyo lereme macan sakwise nguntal kidang….

Mugi Gusti tansah maringake pituduh….

Reuni SMP

Jenenge ae reuni…. smp maneh, dadi guyone yo balik ke masa iku… gak ono sing dapuk bos, dapuk bawahan, dapuk guru, dapuk seniman lan dapuk urip liane… sing ono yo dapuk cah umur welasan nang “chasing” patang puluhan, guyon iku kegowo sampek dino sesuke, sesuke maneh…nganti lerem amergo nglakoni dapuk-dapuk urip patang puluhan…lerem amergo kasunyatan….
ehmmmm…saumpomo dapuk bocah welasan mau iso sak ben dino.. hehehehe, ndahneyo nikmate urip hehehehe

Sakdurunge guyon iku lerem….nikmati ae dhisik, ojo jaim… soale embuh kapan maneh iso guyon tanpo mikir status…tanpo mikir ruwete urip…tanpo mikir “dapuk”……

edisi kangen

wewayangan kang tansah katon
wewayangan kang tansah njawil batin
roso kang ngrudopekso ati….ati kang bacut goreh
goreh mikirke wewayanganmu cah ayu…

 

Blog di WordPress.com.

Atas ↑